中秋月餅

中秋快樂，祝大家 人月兩團圓。

。

最近和焗爐談戀愛，大家進展都唔錯。

。

因此，我再焗多批傳統月餅，今次，總結過往多年整餅經驗，算是最好一批，當然還有好多進步空間，但！已經心滿意足了^^

今次焗出黎時D月餅顏色有點淺，特意較高爐温，焗完個身夠晒脹，無裙邊我就好開心，個花又睇到，無之前果D咁，做左無面超人

擺多兩日回埋油，超滿意呀^^
而且顏色又深番好多。

個Pat Pat 又唔燶，呵~ 呵~~

加埋個盒，拎去送人囉。

牛蒡蔬菜湯

最近肥左好多，諗住用牛蒡煲湯，連渣都食埋排多D會好D。

牛蒡：有降血壓、血糖、血脂，防癌功能



做個雜菜湯，有西芹，椰菜，蕃茄，甘筍，薯仔，牛蒡，住部加入個煲度加水，蓋過面，先用大火煲滾，轉中小火煲30分鐘即成。

螞蟻上樹

材料：
豬肉碎四兩、芫茜2棵、蔥1棵、薑5大片、蒜頭3顆、粉絲2扎、花椒粒1湯匙、上湯100c.c.

調味料：
辣豆瓣醬1湯1匙、醬油2湯匙、麻油1湯匙、芝麻醬1茶匙

做法：
1.芫茜切碎、蔥切花、薑切茸、蒜頭切茸。
 2.將熱水鍋中，加1匙鹽、2匙糖，放入粉絲泡軟吸水後，撈出剪段加蓋燜，備用。
 3.起鍋熱油、麻油，煸香花椒粒，濾出花椒油備用。
 4.用上鍋底餘油炒香豬肉碎，再加入蒜茸、薑茸、辣豆瓣醬，倒入上湯、芝麻醬翻炒均勻，接著放入粉絲和少許熱水拌炒，最後將步驟3花椒粒隔著濾網入鍋拌煮入味，調入少許醬油，起鍋前撒上蔥花、芫茜碎，淋入少許麻油和步驟3花椒油即可。

越南(生)春捲

見屋企重有些越南春捲皮，咁就摷吓雪櫃，加埋蔬菜，變成一頓豐富沙律大餐。




材料：
越南米紙，檬粉，牛扖，熱狗腸，紅蘿葡，青瓜，芽菜，生菜，芫茜，薄荷。

調味汁料：
魚露，檸檬汁，糖，指天椒，蒜茸。
(以上所有材料無份量，因為全是隨意的)



做法：
1. 生菜、芫茜、薄荷、芽菜洗淨，青瓜、紅蘿蔔切絲。
2. 把檬粉、芽菜、熱狗腸燙熟。
3. 牛扖煎好，灑上黑胡椒。
4. 米紙放在開水中，將正反面沾濕，趁米紙尚未軟化前將材料放上米紙包起來。
5. 把調味料拌勻，試過合自己口味即可。(有點咸、酸、辣即可)

酥皮奶皇月餅

今年我制造左D，無面見人酥皮奶黃月餅 ，

哈~ ~

只因無細心掃蛋漿，搞到好似花面貓咁 ，

加上個爐温太高，個個好似變形俠醫咁，脹爆。

餅皮材料：
無鹽牛油50克，糖霜30克，低筋粉80克，
吉士粉8克，粉12克，全蛋1個。

餅皮做法：
1.牛油及糖霜放盤內，用手拌勻。
2.加入己混合粉類(低筋粉，吉士粉，奶粉)，捽成麵包糠狀。
3.加入蛋液，用手壓成粉糰後，分開約23克1份，搓圓
用保鮮紙包起，放入雪櫃待30分鐘。

奶皇餡材料 ：麵粉65g，粟粉37.5g，牛油溶液113g，吉士粉37.5g，糖150g，蛋3隻，椰醬400cc
奶皇餡做法
1.將麵粉, 粟粉, 吉士粉,糖橯勻, 逐隻雞蛋加入攪勻。
2.將牛油溶液加入攪勻, 再加入椰醬攪匀, 放入一大平底容器, 蒸約20 分鐘至熟, 即可取出, 待涼, 然後將奶皇餡搓滑, 分成35克1份。

將咸蛋黃8個，米酒1湯匙拌勻，放入焗爐，150C焗8分鐘，放涼後每個切開一半備用

組合
1. 將奶皇餡分割，包入 鹹蛋黃 ，重量約40克。

2. 將粉糰放入保鮮紙中間，用手掌壓薄，包入餡料。

3. 放入已撲有手粉的月餅模內，按平，倒轉推出月餅放在焗盤上。
4. 放入雪櫃30分鐘，使月餅形狀結實一點。
5.月餅面噴小許水。
6.放入己預熱焗爐用240C焗3分鐘。
7.取出，掃上蛋液，再放入爐，爐火調低至220C，焗5分鐘。
8. 將焗盤掉轉方向， 調低爐火至180C，再多焗7分鐘至金黃色後，取出放涼。

入爐時都重好好樣，好快變得面目全非，只有餅身會脹係我想要。

左睇右睇都唔知係乜花

 

 

啱啱焗完出黎，我即刻食左兩個囉。

三文魚魚捲

煙肉香料三文魚捲

材料：
煙肉片6片、三文魚300克、豆角1扎、蒜茸1湯匙

 

調味料：
香草粉1茶匙、黑胡椒粒1茶匙、鹽1茶匙

 

做法：
1.三文魚切粗條，和煙肉片捲起，插入牙籤固定。
2.將三文魚捲入160度油鍋炸至香酥，再放入豆角段過油，撈起。
3.取炒鍋放入蒜茸炒香，再放入豆角和肉捲，加入黑胡椒粒、香草粉和鹽即可。

 

 

 

冰皮月餅

之前做冰皮月餅，試過好多配方，結果都係硬。今次這個方都幾好，硬得.........慢d。哈~

 

冰皮月餅(約10個)

   材料：

麵粉15克，糯米粉30克，粘米粉30克，砂糖30克，牛奶135克，菜油/牛油2湯匙，煉奶2湯匙，食用色素

 

冰皮做法:將冰皮材料完全混和, 放入一個大和平底的容器, 放蒸籠以大火蒸約五至十分鐘至熟, 取出待涼, 搓成粉糰, 放入雪櫃雪1~2小時或過夜, 取出再搓滑揉至有彈力備用,另外一些糯米粉用白鑊炒至微黄成熟糕粉或用片粟粉

 

將冰皮按薄, 包入約40克餡, 灑上糕粉, 按入月餅模, 將月餅敲出即成。
此食譜可做10隻迷你月餅。

將製成品放入雪櫃, 要一星期內食完啊！

 

尼個皮好黏粉，本來想印左花出黎即掃咁D粉，點知一掃個花就扁左，攪到我企左係度，只好由得D粉留係度。

 

用抺茶做外皮嘅抺茶紅豆

 

內餡自己用綠豆炒，因為唔想咁甜，所以減左好多糖，亦因此較為鬆散。

 

用咖啡做外皮+綠豆蓉軟心朱古力

原味+綠豆蓉咸蛋黃




需然唔係好靚，但包裝好送比人都唔失禮吖。

 

沙爹豆腐

 

材料：
豆腐1塊、黃甜椒1/3顆、紅甜椒1/3顆、青椒1/3顆、蒜仁2顆、牛油1湯匙、上湯100c.c。

 

調味料：
沙茶醬1大匙、蠔油1大匙、醬油、香油。

 

 

做法：
1.豆腐切1公分寬塊狀，三色椒切塊，蒜仁拍扁備用。
2.起鍋加少許麻油和油，將豆腐煎至兩面金黃，盛起上碟。
3.熱適量油，加三色椒炒香，調入上湯、少量水、蠔油、沙茶醬和醬油煨煮，起鍋前以粟粉水勾芡。
4.在2.淋上步驟3醬料，關火盛盤即可。

 

中秋月餅

又到中秋啦，試做左D月餅，本來都好靚架，可惜爐温低左D，攪到大象腳。

菜芯炒牛肉

 

菜芯炒牛肉—一個好傳統又好好味嘅，相信個個都識，重炒得好叻。

 

 

小時候牛肉都唔平，亞媽一煮菜芯炒牛肉好快清晒，到而家牛肉一樣唔平，買廿蚊，牛肉檔個伙記面色麻麻地。重不停咁講，點切呀，好少至喎，買多d啦，成家人食無幾多野食至喎。真係吖，比錢你賺，重要亞芝亞左，買餸有時都好受罪。

香草春雞

之前同Blog友仔 Pansy 去梁九記買好抵凍肉，當時凍櫃重有2~30隻春雞，本來都想買多幾隻架，可以惜冰格無位，拎左1隻去排隊比錢之際，Blog告訴我知，凍櫃只剩5隻乍，0.....。返到屋企幫佢解凍之後，發覺以12蚊黎講，都唔細隻估喎，重好好味添。下次去入貨一定要拎多幾隻先得。

 

材料： 春雞1隻、薯仔2顆、紅蘿蔔(去皮)1根、洋蔥1顆、蒜頭2球、蒜茸2大匙、橄欖油。

調味料：
海鹽、甜椒粉1/2大匙、黑胡椒、香草。
做法：1.先用橄欖油100c.c.、海鹽、黑胡椒、蒜茸1湯匙，甜椒粉及香草拌勻，先抺入雞腔內，在春雞表面已叉子戳洞後，均勻塗抹香草醃料後，放雪櫃待2小時或過夜。2.薯仔切塊、紅蘿蔔切塊；洋蔥取半量切對半，備用。
3.烤箱以220度預熱，春雞，與馬鈴薯、紅蘿蔔、洋蔥塊、蒜球一同放入烤盤放進烤箱，烤至表面金黃酥香，再翻面烤至酥香。(時間約1小時)
蒜球(去皮擠出蒜泥)好香好甜架。
本來重有下文架，不過做做吓夠晒鐘要開飯，唔係就會用蒜泥同埋，薯仔，紅蘿蔔，焗雞嘅汁一齊放入攪拌機攪，做成醬汁伴春雞食 la。

合掌瓜去濕湯

尼一輪天氣熱煲湯，煲黎煲去都唔知煲乜好，見合掌瓜當造又平，加埋扁豆、赤小豆、豬肉一齊大火滾15分鐘後，轉中小火煲個半小時，夠晒甜又去濕呀。

不過可能今個夏天實在太熱，我不停咁煲去濕湯水及涼茶，咁大少同埋大小姐唔多飲，迫住我要包底，可能飲得太多涼野，腸胃有點不適，和同事傾起這情況，她也有不適，結論係我地上左年紀無乜火，只好一星期飲一次涼茶及清熱湯水好了。



但！我家大少就喜歡飲用啤酒消暑，又鍾意打機到3~4點，


結果！



個身出滿紅紅的豆豆，重好痕添。




(為免嚇親大家，挑一個無咁驚嚇位置，又開始消退的肉照)

醫生話：可能平時食埋飲埋太多生冷野，又夜瞓，積積埋埋，一次過谷晒出黎，執劑茶會好D。

忠告大家有時間揾吓中醫清吓個底，唔使谷谷埋埋一次爆發有牌搞。