深圳一日遊

今次購物拜大少所賜，因為佢係一個路痴來架，我要帶佢去東門買西裝，咁我就順便買吓日用品，順便有咕哩拎野。大少以前要著得比較正式返工，點知，佢越著越 hea 連啲西裝都掉埋，或借比人唔拎返，我成日都話佢，要留反件西裝褸睇門口，佢話個款會過時，唏！好過晒錢去買吖。

一大早來到，只好係大家樂度食早餐，而家食一個早餐都唔平，成26蚊港紙架。

係東門白馬尼度真係乜都有，一早來到人都唔多隻，但一過九點開始人山人海。

d披肩係香港買30~90蚊一條，尼度由5至13蚊一條最貴都係15蚊，

買幾條都可以當批發，但貴d，都係貴多3蚊一條。

午餐吃左碗粉同個包補充吓體力繼續。

上面同香港一樣會派傳單，吸引人，收埋無諗過會用，其中麥當當個套餐只需12.5蚊人仔1份，2份可以為我節省左12蚊，見差唔多返到香港都夜囉，食埋先走。

今次都唔係買左好多野。

而家好多鋪頭真係好精，寫明特價，同佢講價佢重叫你放低唔好買。

d假眼捷毛亞姐話28~36蚊一盒，一場來到買多兩盒，

買左八盒就拉勻計20蚊一盒。

套黑色西裝只需二佰三蚊港紙，個款擺十年都無問題。

係街行時，見好多人圍住晒，所以買左尼兩條尼龍褲，每條值10個大洋，

但好厚，天冷著應該得卦。

平時我係絶對唔會買盒裝奶返來，不過今次有咕哩又帶定架車仔，唔好同大少客氣。另外介紹隻地瓜粉=蕃薯粉，香港只有粗粒賣，但台灣及大陸就兩樣都有，佢炸野好脆身，又可以保持得好耐架，而且尼隻粉同芋泥搓埋可以做台灣芋圓架。

又買左d小肥羊湯底，但佢貴左，上個月都係11蚊人仔，而家要15.9人仔但都好彩有買，唔係尼幾日凍只可以用濃湯寶。

見個C9推住架車掃左1/3車濃湯寶，心想你拎去買都唔使買咁多吖，

攪到我本來拎一盒都忍唔住拎多兩盒。